我的隨身物分享一

呢幾日嘅天氣令我全家人都好懶洋洋！
所以，
唔寫得多字啦！
就讓我間唔中分享吓我的隨身物品丫！^^

我的隨身物詳解，請參考我呀媽及家姐的兩個臉書專頁，分別係：獅Zone及Naughty Cream Corner！=)

給新手養狗的分享手扎一

我自細同食好有緣！食對我嚟講僅次於玩（天音：妳有咩好做嘅呢？唔係食就玩，一係瞓架喇！）！

一歲多之前，我食好多補品架！例如：對骨骼好的、對毛髮好的、對消化系統好的。。等等等等。。總之人哋話係好嘅，我家姐呀媽就會買一大堆歸家，聽講最高紀錄：養我嘅頭三個月，每月花成萬蚊响我身上，唉！真係好敗家呀。。我指佢哋倆個傻婆（天音：往事不堪回首！當交學費啦！）！

其實，帶我去多啲街讓我有多啲社交生活，令我每日能耗盡精力，已經係好好的生活平衡，得以身心健康！

當然，食適量及適當的補品還是必要嘅！由其歲多前開始食才見真效，到歲多已可停食補品直到七至八歲。所以，已經五歲嘅我已無食補品多年，身形依然健碩，後腳有力（鬆獅犬嘅先天因子多有後joint問題），跳得跑得！多虧呀媽家姐所遇過的獸醫呀、營養師呀、Dog trainer呀。。佢哋嘅提醒咋！

無論如何，我好多謝我有一個好breeder！從我未出娘胎開始已悉心照顧，所以我先天身體扎實，讓我的成長期無咩機會食太多藥物！好感恩！

病痛少，人狗都會開心啲！^^

下一回我會分享，我食過嘅而又覺得好嘅補品俾大家（先不著重咩品牌，而係建議有咩係必吃補品！）！=P

遙想當年。。。

大家好！我叫忌廉！我家姐真係好鬼懒！到我家吓五歲嘅時候先重開我個Blogger！原本五年前我就有自己嘅網絡空間架嘛！哼！衰家姐。。我決定唔睬妳。。。（天音：嘿！妳叻嘅咪自己繼續寫囉。。又無人阻妳嘅！好哇！妳等陣自己入廚房煮嘢食丫嗱！我唔會幫妳架！）哎呀。。家姐。。我都未講完：唔睬妳。。我就傻啦（滴晒汗）！喂喂喂！家姐。。妳去邊呀？我份宵夜呢？（嘭！關門聲！）喂喂喂。。唉。。都話：寧得罪小人，莫得罪女人！又一活生生例證！

Well, 言歸正傳！五歲嘅我先要介紹Creamybaby時期的我。。。

如圖：大食懒一件！

我係一頭被私人Breed的鬆獅，話說我尚在親生媽媽肚中時，已是喝魚湯長大！所以，我出生時超級的肥美，非常重磅！我當時的媬姆照顧得我好好架，無幾多日我就已經識得响指定地方解手，亦知道邊啲地方無人批准，我就不能內進。

由我張開雙眼開始，個個都好鍚我，所以我對人好有安全感，任何人都可以抱我架！

到我五十日大，媬姆就帶我返店。。無幾多個分鐘，就有兩個傻婆隔住個窗對住我傻笑，然後仲走埋入嚟睇我添！咁我見悶悶哋。。咪禮尚往來又笑吓囉，點知兩個傻婆又要抱我又要攬我，唉。。其實我哋。。真係好唔熟。。搞咩鬼咁熱情呢？喂喂喂。。做咩個嘴伸過嚟？！喂喂喂。。真係唔熟架。。唔好嘴我！喂！！就咁。。當我失去我的初吻後無幾耐，我的媬姆哭著送別我了。。

（天音：肥忌廉！妳玩夠未？捨得食宵夜未？）夠呀夠呀！食呀食呀。。噢！各位觀眾。。今日就寫住咁多，下回繼續丫。。。拜拜（光速跑走！）